martes, mayo 24, 2022
Anúnciate aquíGoogle search engine
- Advertisement -spot_imgspot_imgspot_imgspot_img

Yoltok Totlahtol “nuestra lengua sigue viva”

Temach. Victoriano de la Cruz Cruz

Ixkopinkayotl: Tlahtoah sekin siwameh

Tohwantin tiktekiwiah totlahtoltsin mohmostlah, nikan, nepa ichyok neka. Ipan inin tlalli tlen itokah Chapiktla, Chikontepek nikan tinawatlahtoah. Nohkiya tlahtoah towanpoyowan tlen itstokeh iwan nemih nepa Teposteko tlen tiktokaxtiah Nawatlahtolli tlen nikan Kwextekapan tlalli. Ika yolpakistli nikan mohmostlah titlahtoah. Sekin kiihtoah kenke titlahtoah mohmostlah iwan inin totlatol amo ipatih, na nikihtoa kenke tlan amo ipatih tlan nikan tiewanih iwan ika inin totlahtol tlechtlamaka mohmostlah. Kanpa tinemih iwan tiyowih sehkanok tlalli nohkiya nopa tikwikah totlahtoltsin.
Ipan inin amatlahkwilolli nimechmatililtia, totlahtol nokka yoltok iwan ipan miyak chinankotsitsin iwan pilaltepetsitsin tiksenkwiliah titlahtoah ipanpa ihkinon moneki ma pano, sekin toyolikniwan nohkiya pewah moyolchiwakah iwan nohkiya achiyok kitekiwiah inintlahtoltsin. Kwalli tikmatih amo san nikan titlahtoah Nawatlahtolli so Mexikatlahtolli, nohkiya kitekiwiah inin tlahtolli ipan sehkanok tlalli ken Guerrero, Morelos, Michoakan, Xalixko, Tlapachko, Tlaxkallan, Estado de México, Morelos, Hidalgo Guerreo, Durando, Colima, Nayarit, Oaxaka iwan melawak nikan Veracruz tlalli.
Amo tiseliltitsin nikan tinemih, nohkiya tinemih iwan tiknehnewiliah totlahtoltsin ipan nochi tlalli Mexko iwan nohkiya sekin toyolikniwan ipan tlalli tlen El Salvador, Europatlalpan iwan Estados Unidos tlalli. Nikan tinemih iwan nikan tinemiseh mohmostlah iwan kwesoll iwan yolpakistli ipanpa ihkinon tonemilis, kemantika timokwesoah iwan kemantikah tiyolpakih iwan tiwetskah ipanpa se tlamantli ihkinon technekilia.
Na niknekiskia sekinok toyolikniwan ma motlahtlanilikan tlan nelliya ipatih titlahtol so amo. Na nikmachilia kena moneki tlawel ma tikchikawiltikan sankanpaweli tiyowih. Totlahtol yoltok iwan amo san tikkwamahkawaseh ipan tlasolli ipan inin malwilli.